澳門賭業猛人、兼太陽娛樂文化老闆周焯華(洗米華)有錢又有型，除咗有個靚老婆陳慧玲(Heidi)，仲同情人Mandy Lieu打得火熱，可說係左右逢源！不過自從洗米華同Mandy去年上演一幕「世紀一拖」，Heidi終於忍無可忍，決心要同洗米華離婚！Heidi坎意已決，不過佢仍獲周家上下力撐，現獨力照顧大女周梓潼及細女周善潼。華哥近日雖然在倫敦陪Mandy待產第二胎，不過佢一直未肯離婚，而且對Heidi仍愛護有加，兩人日前現身同一個派對時，更似有復合之勢！

洗米華與Heidi呢日在澳門一同出席好友的生日派對，派對尾聲時， 一眾嘉賓到台上唱卡拉OK，略帶醉意的洗米華到台上大唱情歌冧Heidi，佢先選張學友名曲《吻別》與Heidi合唱，一班好友順勢將Heidi推到洗米華身邊。初時Heidi顯得有點抗拒，不過在洗米華主動出手攬實之下，Heidi開始眼泛淚光，感動到眼濕濕！

之後兩人再合唱張震嶽的經典情歌《愛我別走》，呢首歌的歌詞實在非常應景，Heidi一邊聽一邊失控落淚，華哥則在台上全程都攬到Heidi實一實，而其他嘉賓朋友都紛紛大叫︰「復合」、「和好如初」等說話，成為當晚生日派對的焦點！其實早前已有消息指華哥向Heidi送上價值四千萬的澳門地舖，今次再大唱冧歌，睇嚟真係好有誠意！

當晚派對由林盛斌(Bob)擔任司儀，佢就話唔知華哥同Heidi在台上講咗咩，唔敢肯定兩人係咪會復合，不過都希望佢哋可以處理好關係，因為大多現場賓客都希望佢哋可以和好如初。

一邊廂華哥同Heidi似乎舊情復熾，另一邊廂的Mandy又如何？早前就有網民在倫敦野捕華哥同Mandy，見到華哥目無表情之餘仲有啲藐嘴；而Mandy都唔好得去邊，一樣係黑口黑面咁，唔通華哥個心早已飛咗返澳門？

Heidi雖然已經離開周家，不過佢同周家人依然保持良好關係，尤其與洗米華大仔周柏豪好老友，不時都會見到佢哋一齊食嚇飯影嚇相，早前先見到柏豪同洗米華家姐一齊去到Heidi開設的餐廳與Heidi歎下午茶。唔知周家人的全力支持，會唔會成為Heidi與華哥復合的動力？